Mostrar mensagens com a etiqueta 20130314. Mostrar todas as mensagens
Mostrar mensagens com a etiqueta 20130314. Mostrar todas as mensagens

15/03/2013

Problemes pendientes nel procesu d'escolarización de la llingua asturiana y del gallego-asturiano

Documentu dirixíu a la Sra. Conseyera d’Educación, Cultura y Deportes 


Problemes pendientes nel procesu d'escolarización de la llingua asturiana y del gallego-asturiano


Anque tratamos los distintos problemes que-y afecten a la llingua asturiana en función de les distintes Etapes Educatives, hai delles cuestiones que tienen un calter xeneral y que constitúin una torga pal progresu del so afitamientu nos centros.

La inestabilidá del profesoráu
Ye ún de los principales problemes. Los docentes camuden cada cursu d’alumnáu y nun ven posibilidá de sacar alantre proyectos a mediu plazu nin compartilos con otros especialistes o departamentos. Esta inestabilidá crea tamién incertidume nes families, que tienen que matricular na asignatura a los fíos o fíes ensin conocer nunca al docente que va impartila. Pue vese la importancia d’esta cuestión viendo cómo n’aquellos centros onde por fortuna’l profesoráu se caltien per dellos años dase un aumentu del númberu de matricula- ciones nos primeros cursos a la par que se mantienen nos caberos.

Criación de la especialidá
La criación de la especialidá sedría un primer pasu pa “normalizar” la situación del profesoráu. Les sos places podríen formar parte de la plantiya y daríase pasu a los procesos normales d’accesu a la función pública docente, cola convocatoria d’oposiciones y l’axudicación definitiva a un centru determináu.

L’asturianu como llingua vehicular
L’enfotu na recuperación y desarrollu de la llingua asturiana (tamién esplícitu na Llei d’usu) debiera ser ún de los oxetivos de la Conseyería d’Educación y Cultura. Pensamos que nestos momentos, onde’l plurillingüismu ye’l proyectu más fomentáu nos centros educativos, l’asturianu y el gallego-asturiano deberíen tener un espaciu como llingües vehiculares en toles etapes educatives, contribuyendo asina de forma real al so usu normalizáu y faciéndoles salir del requexu zarráu que supón la clas d’Asturianu.

La oficialidá como garantía de la dignidá de la llingua asturiana
Col procesu vivíu de la que salió l’Anteproyectu de la nueva llei d’educación, que torgaba dafechu la presencia de la llingua nel sistema educativu, quedó evidente como enxamás que la falta d’oficialidá caltién al asturianu siempre nuna situación de desprotección que-y torga garantizar los derechos de la so comunidá de falantes. Creemos que nun ye abondo un “status especial” que se camude en función de quien tea gobernando en cada momentu, sinón que lo que correspuende ye impulsar una reforma estatutaria qu’empobine pa la oficialidá. Esti impulsu tendría que ser l’enfotu de la Conseyera d’Educación y Cultura.

L’asturianu na Etapa d’Infantil
El principal problema na Etapa d’Infantil ye que nun se ta ufiertando a les families la posibilidá de dar asturianu. Anque hai delles escueles onde s’imparte l’asignatura, especial- mente nos CRAs, nun s’acaba de normalizar la situación, dexando en condiciones de desigualdá a les families que reclamen el mesmu derechu nos centros onde matriculen a los sos neños y neñes. Creemos que la ufierta debiera ser obligatoria cumpliéndose asina l’artículu 10.1 de la Llei d’usu y promoción que fala de tolos niveles y graos de la enseñanza.

L’asturianu na Etapa de Primaria
En Primaria meyoraría enforma la situación de l’asignatura de Llingua en cuantes se solucionara’l problema de la estabilidá del profesoráu. Una situación d’igualdá de condiciones col restu de docentes daría pie al desarrollu d’actividaes y proyectos de fomentu del asturianu.

Otru problema a solucionar ye la segregación del alumnáu en función de les alternatives qu’ésti escueya. Nos centros onde se configuren los cursos de forma que se xunten na mesma clase tolos que dan asturianu y n’otra tolos que nun lo dan xenera la percepción nes families qu’hai clases onde tienen más hores pa les materies “importantes” y otres onde non. Al nun haber alternatives curriculares al asturianu, eses hores xeneraes en clases onde naide da Llingua conviértense en dellos casos en hores de recuperación y avance de materies troncales.

De cara al futuru y si entra en vigor la nueva Llei d’Educación, esmoleznos como colectivu la forma en que va ufiertase l’asignatura d’Asturianu. Nun queremos que se reproduza la situación vivida agora na Secundaria y nel Bachilleratu, onde na práctica hai una competencia en condiciones de desigualdá.

Reivindicamos un status que fomente la matriculación en Llingua y que favoreza l’usu y la presencia normalizada na vida ordinaria de los centros.

L’asturianu na ESO y Bachilleratu
Na Educación Secundaria Obligatoria y nel Bachilleratu ún de los problemes principales ye’l de la desixencia de ratios mínimes pa impartir l’asignatura, que, anque fueren anulaes polos tribunales, siguen tando en vigor en bien de centros.

D’otru llau, el fechu de que na ESO l’asturianu compita con otres asignatures, xeneralmente segundos idiomes con muncha más promoción y prestixu social por nun falar de la percepción de la so supuesta “utilidá”, déxalu nuna situación de clara inferioridá, especialmente en 4u.

Por si fuera poco, topámonos en dellos centros con casos perclaros de “secuestru d’alumnos”, que son sacaos, yá entamáu’l cursu va delles selmanes, pa metelos en clases de refuerzu o incluso, y esto ye lo más escandaloso, n’otres asignatures más necesitaes de matrícula.

No que toca al profesoráu, el fechu de qu’esti tea integráu, siguien- do un criteriu como mínimo chocante, nel departamentu docente de Llingua Castellana, fai que n’abondes ocasiones nin el profesoráu se sienta amparáu y/o representáu por esi departamentu, nin que’l propiu departamentu se crea na obligación de facelo, llegando en bien de casos a situaciones incómodes que pa nada contribúin a la calidá docente. Nesi sen, la criación del departamentu específicu de Llingua Asturiana, con voz propia y en pie d’igualdá colos demás departamentos nes CCP de los IES, ye una urxencia inaplazable.

En Bachilleratu topámonos cola situación paradóxica de que los alumnos qu’escueyen l’asignatura de Llingua Asturiana ven cómo la mesma nun computa na ponderación de la media académica pa la PAU, polo que ye una torga evidente pa que puean escoyela los alumnos que quieren optar a carreres universitaries con una alta nota de corte. Al mesmu tiempu, resulta inaceptable que la propia materia nun s’ufierte na PAU, cosa absolutamente inxustificable dende cualisquier puntu de vista.

P’acabar, y anque yá ta mentao nos primeros párrafos d’esti testu cuando se fala de la necesidá de sacar l’asignatura d’asturianu o gallego-asturiano del contestu esclusivu y escluyente de l’asignatura de dos hores selmanales pa pasar a ser llingua vehicular d’otres materies de conocimientu, entendemos que ye indispensable nos IES plantegase en serio y d’una vez la criación de centros billingües, como yá los hai de castellán-inglés y castellán-francés, onde l’asturianu seya l’idioma en que s’impartan parte de les asignatures.

Asamblea de Docentes de Llingua Asturiana y Gallego-Asturiano.

Uvieo, 14 de marzu del 2013

Descargar Problemes pendientes nel procesu d'escolarización de la llingua asturiana y del gallego-asturiano [PDF 160kb]

Resume de la reunión de l’Asamblea de Docentes de Llingua Asturiana y Gallego-Asturiano cola conseyera d’Educación Ana González

Güei xueves 14 de marzu celebróse la reunión solicitada cuantayá (n’avientu) pola Asamblea de Docentes de Llingua Asturiana y Gallego-Asturiano a la conseyera d’Educación Ana González. A la reunión asistieron cinco persones en nome de l’asamblea y per parte de la Conseyería, amás de la propia conseyera, l’asesor en materia de Llingua Asturiana.

Resumiendo, podemos dicir que foron too bones palabres. Empezó la conseyera reconociendo que, depués del tercer anteproyectu de la llamada Llei Wert, la pelota ta en teyáu del Gobiernu del Principáu d'Asturies. La voluntá de la so conseyería, afirmó, ye dexar l’asturianu “polo menos como taba hasta agora”, y cumpliendo la Llei d’Usu.

Dende l’Asamblea, amás de sorrayar que la situación actual yera frutu de l’ausencia d’oficialidá del asturianu, cosa qu’almitió pero diciendo tamién que d’eso nada, fixímos-y llegar les reivindicaciones que yá plantegáremos nel so momentu na asamblea. Tomó nota de tolo que-y diximos, y comprometer comprometióse a poco, anque concretóse más nel tema d’Educación Infantil, no que toca a la so xeneralización –y eso depués d’alusiones pela nuestra parte a la xudicialización del asuntu-, asina como reiteró’l compromisu nesta lexislatura en sacar alantre la especialidá.  Sobre’l problema de les ratios que se apliquen nos institutos quedó en dexalo reflexao na circular d’iniciu de cursu, clarificando que nun se puen aplicar nel casu del asturianu.
De coses como l’asturianu como llingua vehicular, la criación de departamentos didácticos nos IES, la non segregación del alumnáu, la presencia na PAU, etc. tomó nota pero nun concretó nada, anque de la segregación del alumnáu sí desplicó que nun conocía esi datu y que-y paecía interesante, yá que ta mui sensibilizada con esi tema.

Faló tamién de cómo la LOMCE diba suponer un “revolcón curricular” y qu’había que ver en qué midida diba afectar al currículu asturianu, que, sigún ella, ye bien curiosu. De toes maneres, comentó tamién que diba ser el propiu desendolque de la futura llei a nivel autonómicu el que podría valir pa fixar el profesoráu, tanto d’asturianu como de les demás materies.

En definitiva, bones palabres qu’habrá que ver en qué se concreten. Tamién mos dixo que nun esperáremos “una revolución” nesi tema, cosa que seguramente nengún de nós fai, polo que va ser la nuestra capacidá de presión y movilización la que sirva pa obligar a l’alministración a mover ficha nesti tema, como en tantos otros.

Documentu dirixíu a la Sra. Conseyera d’Educación, Cultura y Deportes: Problemes pendientes nel procesu d'escolarización de la llingua asturiana y del gallego-asturiano. [PDF 160kb]