Resolución del Claustru y los Conseyos Escolares

Resolución del claustru / Conseyu Escolar 

 El claustru del ................................. de ................................., énte l’anteproyectu de Llei de Meyora de la Calidá de la Educación (LOMCE), constata que:

•  Al acutar el Ministeriu d’Educación la definición del currículu en tolos detalles, torga implícitamente la posibilidá d’incluyir la Llingua Asturiana o el Gallego-Asturianu na ufierta educativa, al nun haber espaciu pa la materia nin nes asignatures troncales, nin nes específiques, nin nes d’especialidá.
• De dase esa situación, desapaeceríen dafechu los 230 puestos de trabayu qu’hai esti cursu de docentes de Llingua Asturiana y Gallego-Asturianu na rede pública.
• Polo tanto, desapaecería tamién el derechu de la población asturiano a estudiar la so llingua en tol sistema normalizáu d’enseñanza depués de trenta años de presencia que, anque precaria, arriqueció enforma el conocimientu de la población escolar asturiano d’elementos fundamentales de la so cultura. Supón, amás, l’incumplimientu de la Carta Europea de les Llingües Minorizaes, roblada pol Reinu d’España, y entraría en contradicción col propiu Estatutu d’autonomía asturianu.
• La consecuencia cabera d’esti procesu sería asina la perda del padremuñu cultural y llingüísticu de tolos asturianos. Por too ello, esti claustru encamienta a los responsables educativos del Principáu y al gobiernu y Xunta Xeneral nel so conxuntu a poner les ferramientes llegales amañoses pa garantizar la presencia de la Llingua Asturiana y del Gallego-Asturianu en toles etapes del sistema educativu y coles garantíes y condiciones de dignidá que-y correspuenden. 

 En .........................., a ............ de ....................... del 2013

[Descargar PDF n'asturiano y castellano]

Declaración del 15 de xineru

DECLARACIÓN DEL PROFESORÁU DE LLINGUA ASTURIANA Y GALLEGO-ASTURIANU

El profesoráu de Llingua asturiana, aconceyáu'l martes 15 de xineru nel IES Aramo d'Uviéu quier manifestar a la opinión pública les siguientes cuestiones:

• Cola publicación del segundu anteproyectu de reforma educativa, que divide a les asignatures en tres grupos, “troncales”, “específiques” y “d'especialidá”, nin la Llingua Asturiana nin el Gallego-Asturiano tienen posibilidá de caltenese nel sistema educativu. Nuevamente, la falta d'estatus d'oficialidá de la Llingua supón una torga pala so presencia y el so desarrollu normalizáu na sociedá.
• Esti retrocesu del principal padremuñu cultural d'Asturies tien repercusiones pergraves nel ámbitu educativu. Dempués de 30 años d'implantación curricular, onde la población asturiano exerció'l derechu a estudiar la so llingua, atópase cola imposibilidá de siguir faciéndolo, emprobeciendo'l conocimientu d'elementos fundamentales de la so cultura. Supón, amás, un incumplimientu de la Carta Europea de les Llingües Minorizaes, roblada pol Reinu d’España, y entraría en contradicción col propiu Estatutu d’autonomía asturianu.
• Les repercusiones a nivel llaboral, dau'l contestu económicu, nun necesiten munches esplicaciones: nestos momentos  alrededor de 230 profesores que tán poniendo clase d'Asturianu y Gallego-asturianu na rede pública quedaríen ensin trabayu. Profesores que, hasta agora, vienen exerciendo la so función nunes condiciones enforma revesoses y precaries.
• Por too ello desiximos al Gobiernu asturianu, non solo qu'utilice tolos medios necesarios pa camudar l'actual redacción del anteproyectu de llei, sinón qu’acabe cuanto primero con esta situación que caltién a la llingua nun estatus de segundu orde declarando la oficialidá y criando la especialidá de Llingua Asturiana nel Sistema Educativu.

Uviéu, 15 de xineru de 2013

Descargar PDF

Resume de l'Asamblea del 15/01/2013

I.E.S. Aramo, Uvieo

• En primer llugar dase una esplicación de cómo cola nueva redacción del anteproyectu de la reforma educativa nun tien cabida la asignatura de Llingua Asturiana. Esto supondría la desapaición del asturianu del sistema educativu.
• Infórmase de la propuesta de l'Academia de la Llingua Asturiana que consiste en facer una enmienda al artículu 4u onde quede recoyía la enseñanza de les llingües non oficiales pero que tienen reconocimientu xudíricu y implantación curricular. Dende la Conseyería fíxose público la intención de defender la continuidá de la presencia del asturianu. 
• Depués del debate alcuérdase:
• Aprobar una resolución de l'asamblea onde denunciamos la situación y reivindicamos la continuidá de la llingua nel sistema educativu y la oficialidá de la mesma.
• Aprobar un documentu pa llevar a los claustros de los centros y a los Conseyos escolares onde se manifieste l'apoyu de la Comunidá Educativa a les nuestres reivindicaciones.
• Cada profe nel so aula trabayará col alumnáu pa qu'escriba cartes manifestando'l so apoyu al asturianu y pidiendo poder siguir exerciendu'l derechu a estudialu. Quedamos entregar toos xuntos estes cartes el 31 de xineru a les 17:30 de la tarde nel Rexistru Xeneral del Principáu. Llamaráse a la prensa y pretende ser un actu reivindicativu que muestre la demanda social que dalgunos ignoren.
• Va pidise una reunión cola Conseyera d'Educación pa que nos informe sobre los resultaos de les reuniones col ministeriu. A esta reunión dirán les persones (en función de la disponibilidá) que s'apuntaron voluntaries na asamblea.
• Otres persones comprometiéronse a trabayar nes plataformes dixitaes tipu “change.org” pa pidir firmes d'apoyu y difundir la situación na rede.
• Va consultase con “Xuristes pol Asturianu” les posibles víes xuridiques énte la contradicción de los derechos reconocíos na Llei d'usu y l'Estatutu d'Autonomía y la LOMCE.
• Faeránse peticiones a la Defensora del Pueblu (Soledad Becerril) y a la Procuradora Xeneral del Principáu (Mª Antonia Fernández Felgueroso).
• Contactaráse cola Universidá d'Uviéu pa que tanto a nivel institucional como a nivel d’asociaciones d'estudiantes se faigan posiciones públiques sobre esti tema.
• Caún, si ta afiliáu a dalgún otru sindicatu, pedirá al mesmu que tome posición al respectu.
• Alcuérdase tamién contactar coles fuercies polítiques presentes na Xunta Xeneral pa que fagan pública la so postura sobre esti tema.
• De momentu, y esperando poder cuntar en breve con una páxina web onde centralizar tola información, ta usándose’l grupu en facebook “Conceyu de Mayestros/es de Llingua asturiana”.